The Universal House of Justice

Ridván 2016

To the Bahá’ís of the World

Dearly loved Friends,

Nau tasol dispela taim bilong Ridván i kamap, em King bilong ol Taim Bilong Amamas. Nau tasol ol wok i go pas long kirapim narapela nupela Plen long olgeta hap long graun, ol dispela wok i kamap pinis. Olsem na mipela i singautim ol pren bilong God long helpim long dispela nupela Plen, em faivpela yia we ol i no ken pret long wok strong na givim planti samting bilong helpim long dispela wok.

Ol lain bilong Bahá’u’lláh i stap strong long bilip na ol i sambai long helpim. Nau tasol planti kibung bilong ol lain komiti bilong dispela Lotu i kamap pinis long olgeta hap long graun. Na ol dispela kibung i soimaut olsem ol bilipman i gat bikpela laik long go het tru na kirapim dispela traipela wok. Nau tasol ol bilipman i wok long kirapim plen bilong bihainim ol gutpela tok i stap long dispela pas i bin go long Kibung bilong ol Kaunsila. Longpela taim tru ol bilipman i wok long kirapim dispela komyuniti na ol i soimaut olsem ol i kisim planti gutpela save long rot bilong go het. Olsem ol i redi nau long dispela taim. Dispela tupela ten yia i go pinis nau i soimaut olsem ol i kamap strong tru na ol inap long go het tru.

Long dispela taim ol pren i bihainim wanpela gutpela plen bilong mekim ol wok. Isi isi ol dispela wok i kamap gutpela moa na save bilong ol bilipman i kamap gutpela moa. Pastaim tru ol i bin stat long mekim sampela liklik wok bilong helpim olgeta manmeri. Bihain dispela save bilong ol i kamap bikpela moa na ol wok i bikpela moa na ol wok i go het moa moa yet. Dispela pasin bilong bihainim wanpela plen na mekim wok bilong strongim save bilong ol manmeri na strongim wan wan komyuniti, em i stat long planti tausen klasta – na dispela wok i go het tru long planti klasta olsem. As tingting tru bilong ol dispela wok, em i no samting bilong wanpela bilipman tasol, o samting bilong wanpela komyuniti, o samting bilong ol lain komiti bilong dispela Lotu. Nogat. Olgeta tripela lain olsem i mas helpim long mekim kamap dispela nupela Pasin Long Olgeta Hap Long Graun. Olsem na ol pawa bilong spirit i save strongim ol long dispela wok bilong mekim dispela Plen bilong God i go het. Isi isi sampela mak i save soimaut olsem olgeta i save wok gut wantaim na ol i go het. Planti bilipman tru i kisim gutpela save long laip bilong Bahá’u’lláh wantaim pawa bilong dispela Tokaut bilong Em na dispela Kontrak bilong Em. I no gat narapela Kontrak olsem. Olsem na ol bilipman i no pret long stori long ol dispela samting long olgeta manmeri. Olsem na ol dispela stori i save pulim planti lain manmeri i kam kamap long dispela Lotu bilong Em na ol i save helpim long winim ol mak bilong en, em ol mak bilong bungim olgeta manmeri wantaim. Ol grasrut long wan wan komyuniti, em ol Bahá’í wantaim ol poroman, ol i save tokaut long gutpela pasin tru long pawa bilong ol wok bilong dispela Lotu, olsem ol dispela wok i ken senisim pasin bilong wan wan man wantaim sindaun bilong olgeta manmeri. Long planti moa kantri ol man bilong ples i save helpim moa moa yet long ol lain komiti bilong Bahá’í na gutpela tok bilong ol i save soim rot long olgeta komyuniti. Olgeta bilipman i save givim mani long Fan olgeta taim na ol i givim planti mani tru na ol i mekim bikpela ofa. Em pasin bilong strongim tru ol wok bilong dispela Lotu, olsem em i go het oltaim. Nau tasol planti bilipman i save kirap long mekim sampela wok bilong strongim ol komyuniti. Na tu planti bilipman i save wok wantaim bilong mekim sampela wok. Dispela kain pasin i no stap bipo. Planti yangpela i lusim tingting long laik bilong ol yet na ol i kirap na ol i wok strong tru. Wanpela bikpela wok bilong ol, em long lainim ol pikinini long ol tok bilong God. Planti kibung bilong kolim prea i stap long wan wan komyuniti, olsem spirit bilong dispela komyuniti i kamap strong moa. Ol bilipman i kisim moa save long kain kain wok bilong lukautim dispela Lotu, em long Bahá’í Administresen. Ol lain komiti bilong dispela Lotu wantaim ol kodineta na kain kain helpman na wan wan bilipman, olgeta i redi long helpim na ol i save tingting moa long gutpela pasin bilong mekim olgeta wok i go het. Ol i save skelim ol wok i kamap pinis long ples bilong ol yet. Na ol i save skelim ol save na ol laik bilong ol wokman long ples bilong ol yet. Olsem na ol i skelim olgeta samting na bihain ol i wokim plen bilong mekim olgeta wok i go het moa moa yet. Nau tasol olgeta bilipman i save gut long dispela pasin bilong stadi o kisim moa save, na skelim tok wantaim, na mekim sampela wok, na tingting bek long dispela wok – em gutpela pasin bilong kisim moa save oltaim. Isi isi ol bilipman i klia liklik long gutpela rot bilong bihainim ol Tok bilong God na helpim olgeta manmeri olsem. Isi isi ol bilipman i save painim rot bilong tokaut moa long ol gutpela Tok bilong Bahá’í long kain kain kibung bilong ol saveman. Isi isi ol bilipman i luksave olsem, olgeta wok bilong dispela komyuniti long olgeta hap long graun, em i save helpim tru long mekim kamap dispela gutpela sindaun bilong God. Ol dispela wok i mekim pawa bilong dispela Lotu i kamap ples klia, em pawa bilong mekim kamap dispela gutpela sindaun. Tru tumas, isi isi ol pren i kisim save long as tru bilong olgeta lotu. Em long senisim tingting na pasin bilong wan wan man. Em long bungim planti moa manmeri wantaim, olsem ol i stap wanbel. Em long wok wantaim long helpim olgeta manmeri. Em long helpim kain kain lain manmeri long lukautim laip bilong ol yet – em laip bilong spirit na gutpela sindaun na ol wok bilong kirapim divelopmen long ples. Olgeta wok olsem i ken mekim dispela graun i kamap gutpela tru.

I no gat wanpela mak tasol bilong skelim olgeta wok bilong dispela Bahá’í komyuniti. Wanpela mak i stap, em long mekim ol wok bilong dispela Lotu long 5,000 (faiv tausen) klasta long olgeta hap long graun. Nau tasol mipela i tok tenkyu long ol blesing i kam long dispela Naispela Man bilong Abhá na mipela i tokaut olsem, ol bilipman i kirapim wok long moa long 5,000 klasta. Ol dispela wok, em as tru bilong mekim kamap ol wok bilong dispela taim long olgeta Bahá’í komuniti – olgeta wok i mas i go het moa moa yet long ol klasta we sampela wok i kamap pinis. Na tu olgeta wok i mas goaut moa na strongim pasin bilong gutpela sindaun long wan wan komyuniti. Dispela wok i mas i go het olgeta taim. Em i traipela wok. Tasol ol dispela wok i gat traipela mak. Em inap long senisim laip bilong olgeta manmeri. Maski sapos ol man i wokabaut long dispela rot na ol i no tromwe lek i go longwe tumas. Sapos ol i go het olgeta taim na ol i traim long wokabaut kwiktaim liklik, bai ol i wokabaut longwe tru. Long stat bilong dispela Plen, em i gutpela sapos ol i tingting strong long ol wok i mas kamap long wanpela klasta long dispela faivpela yia. Ol i ken putim mak bilong mekim sampela wok bipo long dispela de long yia 2017, em de bilong tingim 200 yia bihain long bonde bilong Bahá’u’lláh (em 18 mun bihain long stat bilong dispela nupela Plen). Sapos ol i putim sampela mak olsem, bai ol i go het tru na ol i winim olgeta mak bilong dispela faivpela yia. Wan wan taim bilong skelim wok, em long olgeta tripela tripela mun, em taim bilong mekim ol wok i go het moa moa yet. Olgeta i mas taitim bun na mekim wok, long wanem dispela taim i no ken kam bek gen.

Sindaun bilong olgeta manmeri long graun i save bagarap moa moa yet. Ol mak bilong dispela sik bilong spirit i save kamap strong moa na ol man i bagarap moa. Tingting gut. Ol manmeri bilong graun i save karim pen, long wanem ol i no gat save long trupela marasin bilong stretim ol sik na ol i tantanim long kain kain rot bilong stretim ol hevi. Tasol yupela i save wok long bungim bel bilong olgeta manmeri wantaim, olsem ol i holimpas long dispela Tok bilong God, Husat I Stap Oltaim Oltaim. Tingting gut. Biknois bilong kain kain tingting na kain kain laik i save kamap strong moa long olgeta hap long graun. Tasol yupela i save tingting strong long bungim olgeta manmeri wantaim bilong kirapim ol komyuniti we olgeta i stap wanbel. Bel bilong yupela i no ken sori long ol dispela samting. Nogat. Ol tingting nogut wantaim ol tok kros na pait long dispela graun i mas strongim yupela long tingim olgeta man i stap klostu long yupela yet. Olgeta i nidim tru dispela gutpela marasin na yupela tasol i ken givim dispela marasin long ol.

Dispela Plen nau em las plen bilong ol Faiv Yia Plen. Long pinis bilong dispela Plen, em stat bilong narapela sapta long dispela Plen bilong God. Bai em i makim stat bilong namba tri handet yia long dispela Taim bilong Bahá’í. Em i gutpela tru sapos ol pren bilong God long olgeta kantri i luksave long bikpela mak bilong dispela taim. Dispela faivpela yia, em taim bilong traipela wok, tasol traipela wok moa i kamap bihain. I gat kain kain mak long dispela nupela Plen, olsem wan wan man i ken helpim. Maski sapos dispela wok bilong wanpela man i liklik tru. Mipela i askim yupela, ol gutpela wanwok, husat i laikim tru dispela Man, Husat olgeta long dispela graun wantaim ol heven i laikim tru. Wok hat tru na traim tru long bihainim ol gutpela save yupela i kisim pinis wantaim ol gutpela save God i givim long yupela. Olsem yupela i ken helpim tru dispela Plen bilong God, inap long em i go het moa moa yet na em i kam kamap long dispela nupela sapta. Yupela i wok strong long kolim prea na askim long ol blesing i kam long heven. Na tu mipela i kolim prea olsem long ol Ples Holi na mipela i tingim olgeta bilipman, husat i wok long dispela Lotu, em Lotu i save karamapim olgeta samting.

- The Universal House of Justice